جینسی و جینسیتی آزینلیق‌لار، جینسی یؤنلیم و کیملیک‌لرینی دییشمک اوچون گئنیش طیببی اذیت آلتیندا
شش‌رنگ، ۲۷ اردیبهشت ۱۴۰۲: ایران‌دا ساغلیق سیستمی متخصیص‌لری، جینسی و جینسیتی آزینلیق‌لاری گئنیش بیر سویه‌ده جینسی یؤنلیم یا جینسیتی کیملیک‌لرینی دییشمک زوروندا بوراخماقدالار. شش‌رنگ‌ین ۱۷ می موناسیبتینه، ل‌گ‌ب‌ت+ توپلومونا قارشی بین‌الخالق فوبیا گونونده، یایینلادیغی ساغلیق پالتاریندا ایشکنجه؛ ایران‌دا دوزلتیجی تداوی آدی آلتیندا ل‌گ‌ب‌ت+ توپلومونو گئنیش سویه‌ده اذیت ائتمک راپورو، جینسی و جینسیتی آزینلیق‌لارا قارشی شیددت و آیری‌سئچکیلیگه دایانان حؤکومتین آلتیندا اولان پیسخولوق‌لار و پیسخی‌آتریلار، بو توپلومو باسدیرمانین بیر وسیله‌سی اولموش‌لار.
بو راپورون نتیجه‌لرینه گؤره، ایرانین ۲۵ ایالتیندن بو آراشدیرمایا قاتیلان ۲۱۰ جینسی و جینسیتی آزینلیقا عایید شخصدن، ۱۰۵ نفر، یانی ۵۰ فاییزی بو تداوی‌لره معروض قالمیش‌لار کی اونلارین یاریسینا یاخین اوشاق (۱۸ یاش آلتی) دیر و بو تداوی‌لرین بیر یا بیر نئچه‌سی‌نین مغدورو اولان‌لاردان ۴۵ نفری، یانی اوجدن بیریندن چوخو، اوشاق ایدی‌لر. اونلارین چوخونلوغو بو تجروبه‌نین ایستمه‌دن و زور آلتیندا اولدوغونو بیان ائتمیش‌لر.
دییشدیریجی و یا دؤنوشدوروجو تداوی‌لر آدی ایله تانینان بو تداوی‌لر، قئیری اینسانی، آشاغیلاییجی و قددارجا تداوی متدلاریدیر کی ائشجینسل‌لرین، بی‌سکسوال‌لارین، ترنس شخص‌لرین و اینترسکس‌لرین جینسی یؤنلیمی و یا جینسیتی کیملیگینی دییشدیرمک اوچون قول‌لانیلماقدادیر. بو تداوی‌لار سون ایل‌لرده بیر چوخ دونیا اؤلکه‌سینده یاساقلانمیشدیر.
بو آراشدیرمانین الده ائتدیگی معلوماتا گؤره حکیم‌لر بو توپلومون جینسی یؤنلیمی و جینسیتی کیملیگینی دییشدیرمک اوچون پیسخوآکتیو درمان‌لار وئرمکده‌لر. بو آراشدیرمایا قاتیلان ۹ نفره الکتروشوک وئریلمیش. قئیری‌همجینس ایله جینسی موناسیبت قورماق، مذهبی مراسیملره قاتیلماق، توپلومدا گئییم و داورانیش طرزینی دییشمک، ایسته‌دیگی پارتنر ایله ایرتیباطی کسمک، ائولنمک، دوست‌لاردان اوزاقلاشماق، جینسی حیس‌لرین دییشمه‌سی اوچون موسیقی‌یه قولاق آسماق و یا پورنا باخماق کیمین شخص حُبی‌لردن ال چکمک کیمین پیسیخی و داورانیش تداویسی ده یایقین بیر متد اولاراق اویقولانماقدادیر.
جینسی و جینسیتی آزینلیق‌لار توپلومو ندا فرقیلی قوروپ‌لار آراسیندا، ائشجینسل ارکک‌لر و اونلاردان سونرا لزبین قادین‌لار دیگر قوروپ‌لاردان داها چوخ دییشدیریجی تداوی‌لره معروض قالمیش‌لار. اونلاردان سونرا سیرایلا بی‌سکسوال‌لار، ترنس شخص‌لر و باشقا قوروپ‌لار یئر آلماقدالار. مغدورلار دییشدیریجی تداوی سوره‌سینده ویا اوندان سونرا دپرسیون، اینتیحار میلی، یوخلاماقدا پوزقونلوق، یادداشی الدن وئرمک، دیلین توتولماسی و بیر نئچه باشقا ییخیجی عارضه‌لر تجروبه ائتمیش‌لر.
شادی امین شش‌رنگ شبکه‌سی‌نین مودورو بونونلا علاقه‌لی دئییر: «بعضی روایت‌لری اوخوماق چوخ آجی وئریجی و بو شخص‌لرین ساغلیق اورقان‌لارینا قارشی نه قدر عاجیزلیگینی گؤسترمکده‌دیر. ائشجینسل موناسیبتی‌نین کیریمینالیزه ائدیلمه‌سی عملده بو توپلومون عضولرینی قانون قارشیسیندا حساس بیر وضعیته گتیریب و هر نوع مودافیعه و موقابیله گوجونو اونلاردان آلمیش».
ساغلیق پالتاریندا ایشکنجه راپورو عاییله و ساغلیق سیستمین متخصیص‌لری‌نین بیر بیرلری‌نین یانیندا و دولتی سؤیلمین تاثیری آلتیندا، جینسی و جینسیتی آزینلیق‌لاری دییشدیریجی تداوی‌لره تشویق ائتمکده اَن چوخ رولو اوینادیقلارینی گؤسترمکده‌دیر.
ضرر وئریجی و قددارجا تداوی‌لرین یانیندا، دییشدیریجی تداوی‌لره معروض قالان شخص‌لرین ۹۰ فاییزی، تداوی سوره‌سینده متخصیص‌لر طرفیندن، پیسیخی و سؤزلو شیددت گؤرموش‌لر و اونلارین ۶۰ فاییزی ایجباری و کنترل ائدیجی داورانیش‌لار تجروبه ائتمیش‌لر. فیزیکی شیددن ده اونلارین ۳۰ فاییزی طرفیندن بیلدیریلمیش.
جمهوری اسلامی هر زامان بین‌الخالق ساحه‌لرده ائشجینسل‌لره اویقولانان الکتروشوک و باشقا دییشدیریجی تداوی متدلارینی اینکار ائتمیش. اما بو آراشدیرما بو متدلارین گئنیش بیر سویه‌ده قول‌لانیلدیغینی گؤسترمکده‌دیر. شش‌رنگ ۱۳۹۷ده ده یایینلادیغی ساحه چالیشماسی‌نا دایانان بیر راپوردا، پیسخولوژیک و پیسخیآتری تداوی مرکزلری، دولتی دستکلره دایاناراق، جینسی یؤنلیم و جینسیتی کیملیگی دییشمک اوچون ل‌گ‌ب‌ت+ توپلومونون عضولرینی ایشکنجه و اذیت ائتدیک‌لرینی گؤسترمکده‌یر.
شادی امین علاوه ائدیر: بو راپورلاری حاضیرلاییب یایینلاماق و اونلاری بین‌الخالق اورقانلارا ایرائه ائتمک و جمهوری اسلامی‌یه سیاسی باسقی اویقولاماق بیر طرفدن و باشقا طرفدن باتی‌نین علمی اورقانلاری ایله ایرتیباطدا اولان پیسخولوق‌لار، تراپیست‌لر و حکیم‌لری جاواب وئرمک زوروندا بوراخماق، اینسان حقوق‌لاری تشکیلات‌لارینین ایش باشلیق‌لاریندان بیری اولمالی‌دیر.
جمهوری اسلامی‌دا هر نوع هم‌جینس ایله جینسی موناسیبت جرم ساییلماقدا و قامچی و اعداما قدر موجازاتی وار. جینسی یؤنلیم یا جینسیتی کیملیک و یا ل‌گ‌ب‌ت+ توپلومونون اینسان حقوق‌لاری حاقدا معلوماتلاندیرماق، یئر اوزونده فساد ائتمک آدی آلتیندا اعداما قدر جزا آلماقدادیر. بئلنچی بیر اورتام‌دا پیسیخی ساغلیق مرکزلری گئنیش بیر سویه‌ده جغرافیایی و استاتیستیکا اولاراق جینسی یؤنلیم و فرقیلی جینسیتی کیملیک‌لری خسته‌لیک آلتیندا کاتئقوری‌لشدیرمکده‌دیر. بئله‌لیکله ساغلیق اورقانلاری و پیسیخی و پیسخیآتری ساحه‌‌نین متخصیص‌لری کی ل‌گ‌ب‌ت+ توپلومو اوچون گوونیلیر بیر مرکز اولمالاری گرکیردی، اؤزلری بو توپلومو اذیت ائتمک و شیددت گؤسترمک قایناغی حالینه گلمیش‌لر.
شش‌رنگ (ایرانلی لزبین‌لر و ترنس‌جندرلر شبکه‌سی)
راپورو بوردان اوخویون.